生活與生存

爸：

今晚同第四座去咗睇一套講國語嘅話劇，叫「華麗上班族之生活與生存」。個名好有意思。

生活，不外乎衣食住行、起居飲食、返學、工作、戀愛...一系列老生常談。生存？複雜好多。首要條件 - 要自我保護，再來要懂得捕獵：喺懂得進可攻、退可守之後，就要把握機會向上爬，將身邊所有敵人當「朋友」，同時又認清朋友亦係你嘅敵人... 好困難。

我對呢個話劇冇太大嘅共鳴，係因為我好運。

我唔叻，喺所有人眼中冇殺傷力，所以唔驚敵人要將我除之而後快；而且，我冇野心，唔會同任何人爭啲乜嘢，最重要我樂於成為其他人嘅助手，所以唔會有太多敵人 - 不過又未至於蠢到做人哋嘅「工具」。所以到目前為止，一切尚算OK，安全無恙~

你會唔會覺得我冇大志？我只係樂天知命，明白自己個位喺邊，唔作無謂嘅強求 - 呢啲都係我近期嘅得著。就正如我同同事講：除咗屋企嘅事，冇嘢值得放喺心度。所以，我覺得自由咗...

爸，我希望你會為我高興。畢竟心靈嘅平靜同快活，係多多錢都買唔到嘅。我只係期待喺不久嘅將來，我哋可以喺天家同你重聚，一齊再過以前開心嘅日子。

Nite nite，老豆。

肥仔
2010年1月20日
香港．屋企