病情人節

生活開始慢慢回復正常，不過病情完全冇好轉跡象。

自老豆離開我哋開始我就一直發燒。醫生問：你知唔知你發燒呀？102度喎... So what？仲有好多嘢等緊我做，我唔可以病... 但始終我係人，對抗緊嘅係魔(病魔)，我不得不低頭...

2月14日情人節，對我嚟講好似好諷刺。啱啱先有個至親離開我，對我有情嘅人又少一個... 就當養病，我瞓足一日，用嚟慶祝 / 哀悼我嘅情人節。

手續

攞死亡證

到灣仔胡忠大廈登記攞死亡證。8點45分開始攞輪候號碼，辦事處9點開始辦公，申請費用每張$140。我要咗3張，一共$420。

搵殯儀館

同大哥、表嫂去香港殯儀館安排禮儀事項。一切都幾順利。再回到胡忠大廈預定火化爐。

訂火化爐

由於時間已經唔早(都只不過係10點半)，一切好時間已經俾人訂咗，只有晏啲。不過我哋仍然好滿意。一定係老豆暗中幫我哋~

領遺體

為咗更好保存老豆嘅遺體直至葬禮當日，到醫院領回老豆嘅遺體返殯儀館作防腐等工序。過程順利。老豆仲係好靚仔 - 佢喺我心目中永遠都係最靚仔嘅~

申請墓地

到教堂攞神父安排儀式事宜及申請天主教墳場墓地。一切OK。

後事

為老豆辦理後事。

原本要三日嘅醫生證明，三個鐘頭就已經準備好。去醫院結帳都做好，開始真真正正計劃要舉行嘅儀式要點進行。

儘管體力不支，但我一定要撐住，辦好所有事。唔係為任何人，只係盡對老豆嘅最後一點孝心。

倒數完畢

凌晨四點

手電響起，深知不妙。馬上趕赴醫院。護士話其他佢喺晚上情況已經差咗，直到四點，一切終於結束。

生命嘅結束．痛苦嘅結束

倒數第二日下午．傍晚

下午

離開公司，前往醫院。心中仍記住表姐夫講嘅：落藥後應該仲有兩日... 不敢怠慢。

傍晚

親友陸續抵達醫院。每個人都同我講：幾時開始嘅事呀？點解你唔早啲話我聽呀？我喊紅雙眼。點解你哋仲要埋怨我？之前我已經話晒俾你哋聽老豆入咗醫院，你哋仲問我駛唔駛嚟睇佢。你知唔知呢句說話令我好灰？去醫院探病乜要人叫嘅咩？如果我話要，難道你哋會心甘情願咁嚟咩？

大部份人都到齊，只剩遠在加拿大嘅姑姐...

倒數第二日早上

半睡半醒之間。我幫佢"R"痕時，佢同我講：「點解你咁聰明(知道我邊度痕？)」

鼻酸。「我係你個女嚟嘛...」

我有生以來，第一次正式讚我。

打呢篇blog，眼淚仍不停咁流... 除此之外，整個人已經冇乜感覺... 第一次知道乜嘢係「行屍走肉」...

倒數第一日

開始昏睡，仍然未能停止來自身上嘅痕癢感覺。

開始通知親友。

開始計劃。

抉擇

做咗一個好痛苦但又必須做嘅決定。

我究竟係拯救咗佢，定係殺死咗佢？

好痛。淚水不停咁流。對眼好腫，從未如此醜樣過...

我自私嗎？

因為想強留住你而令你痛苦，我係咪好自私呀？但要我睇住你離開，我又點捨得呢？

做抉擇真係好難，有人可以幫吓我嘛...

天家

到底有冇呢個地方？你哋將來會去嗰度嗎？我又會去嗰度嗎？我哋會再見嗎？

爸爸的早餐 - 續

2月10日，斷食第4天。