葬禮儀式由海星堂神父主持。神父為老豆祝聖、灑聖水、祈禱... 將老豆帶到天國。我希望他日我可以喺嗰度同佢再喺一齊。哥連臣角。以為我會為火化老豆遺體哭崩長城。冇。根本，肉身只係一個臭皮囊。當靈魂已經唔有喺度，又要嚟有乜用？我只係一心等待他日同屋企人喺另一個國度再會。解憂飯好文雅，一直我哋都叫佢做解穢酒。既不穢，又無酒招待，點解叫解穢酒？無解。所有世俗嘅儀式都做完，但嗰份心痛依然揮之不去，眼淚依然流過不停 - 對眼仲係好腫、個樣依然好醜...
早上‧放假人，不論生死，始終離不開「買嘢」。買花布置靈堂、買飲品西餅等都唔可以缺少。呢啲係香港人特性鍾意買嘢，定根本係中國傳統習俗？費解 - 費事去解。下午‧出發去靈堂第一次發現原來我哋三兄妹只係平時唔出聲，有事就好齊心嘅人。一齊出門口，一齊為對老豆作最後致敬做準備。靈堂老豆個樣好安祥。我為佢安排著佢平時著嘅衫。化妝師亦為佢化一個好自然嘅妝，令佢睇嚟好似瞓咗一樣。親友陸陸續續到嚟拜祭 - 其實只係鞠躬。又係悲喜交集嘅感覺：悲 - 點解一定要有大事親戚先會「聚首一堂」？喜(其實只可以算係「安慰」) - 原來有咁多人關心老豆同我哋屋企人。
因為瞓唔著同唔想瞓。5年前亦有同樣症狀。阿爺剛離世，令我驚老豆會好似阿爺咁走，成晚走入佢房探佢嘅鼻息。今次一樣。我亦成晚走入阿媽房探佢嘅鼻息。好驚老豆會帶阿媽走。我嘅安全感直線下降...
終於...遠在加拿大嘅姑姐亦返到香港。一家人又再喺一齊。點解...每一次一家人齊齊整整喺埋一齊，都一定係有大件事。上次係阿爺，今次，係我老豆。我...開始收乾嘅眼淚，又再次湧出嚟。或者，我嘅身體機能亦感覺到嗰份分別嘅痛。停唔到...止唔住...
開始有啲討厭Facebook。當自己仍然喺個深淵入面出唔番嚟嘅時候，世界上每一個人都enjoy緊佢哋嘅生活，個世界仍然歌舞昇平。我知道絕對係我自己嘅問題，但心理就係好唔平衡。上天可唔可以俾番以前單純而開心嘅日子我呀？我已經差不多有兩個禮拜冇真正笑過喇...
