39歲的最後一天

驟寒... not really，只係驟涼。

Outing日。唔駛體力勞動，但更攰。

飯餐。唔係乜嘢環球美食，只係家常小菜，但食落更有「家」嘅味道。

外遊。唔係出國豪華遊，但心靈上更滿足。

2009年11月14日，為Michelle嘅39歲，劃下完美嘅句號。

冇誠意

我不嬲都唔會在意禮物嘅money value - 禮物就係禮物，一份心意，就算係細到一粒糖，只要係送禮物嗰個人為我選嘅，我都會好開心。

Gift card係乜呀？用錢「撻」我呀？我唔care有冇生日禮物，但一份咁冇誠意嘅所謂「禮物」，真係多謝晒喇~

屎撈近

今日行過一間琴行，見到一句我好有feel嘅slogan...

KAWAI

もっと伝えたい、感動を。

那一年的幸福時光

再一次出現淚腺發達的癥況，只係睇一個trailer又大流眼淚...

老豆，仲記唔記得嗰一年你同阿媽影嘅一張相？嗰陣係中秋節前後，你剝開一個沙田柚，貪玩嘅你將柚皮放阿媽個頭上，俾我手快影底咗。我哋仲一齊笑張相笑咗好耐。

今日我睇劇，竟然見到同一個場景，一樣係一家人用柚皮做帽。溫馨場面應該係感人嘅，但我不停咁流眼淚...

老豆，你過得好嗎？我好掛住你呀...點解你唔會返嚟探我？你應承過唔會丟底我，點解你連返嚟睇我都唔肯？

我真係好掛住你...

如果我係單無雙...

宋允浩定係盧卡斯？一個係你等咗6年，再返到你身邊；一個係愛得激情，唔理世人嘅眼光，對你全心全意...

一個同你一齊成長；一個陪你走過艱難嘅日子...

一個成熟穩重；一個年輕活躍...

重點係... 兩個都同樣有魅力...

好在... 我唔係單無雙...

不結婚...好呀！

「不結婚，好嗎？」係一個問句，有唔肯定嘅意思。

「不結婚... 好呀！」係我嘅40歲宣言。

老人家話齋：死就一世，唔死就大半世。我嘅前半生為其他人而活；40歲，應該係我為我而生嘅開始。

就好似本書話，依家嚟「玩」結婚，只會將我照顧(屋企)人嘅生活方式同日子無限期延長，對我有乜好處呀？

聽起嚟好似好唔負責任。係呀！咁又點呀？我一生人就係負太多責任，為自己諗吓有罪咩？
無了期咁繼續照顧屋企人，會有人會表揚我咩？依家定等我死咗之後呀？就算有，又有乜用呀？如果喺我死後先表揚我，我會知咩？

有呢個念頭之後果然成身鬆晒。我心入面嗰度門正式落閂。

莎唷娜啦~