出走

有鬆一口氣嘅感覺。去到一個似遠還近、似近還遠嘅地方，心有戚戚然係必然嘅事。還幸上天始終係疼錫我嘅 - 我遇到嘅都係好人。

全然陌生嘅城市，遇上熱情、熱心嘅人，幫我減輕一個人在異鄉嘅恐懼。係因為利益關係？定係因為其他嘢？我冇去諗。既來之則安之。上天一定有為我安排。如果我真係咁好彩遇上要傷害我嘅人，我只好講一聲 - 好嘢~ 咁都俾我遇到...

原來將腦入面嘅嘢清空，好單純咁享受身邊嘅美景、美食，享受別人無論因乜嘢動機而對自己嘅好，感覺真係好好。係我對自己太harsh？我感覺麻木，感受唔到別人對我嘅好？定係身邊根本冇人對我好？係嗰一刻我唔想再諗。冇人愛我唔緊要，只要我仲愛自己，世界仍然係美麗嘅。

2009年12月跨年高雄．墾丁之旅，讓我搵到自己。

我在墾丁．天氣晴

墾丁嘅好天氣令我心情開朗。

藍天、白雲、碧海、黃沙... 一切嘅交織成一幅美麗嘅圖畫。水清沙幼嘅海灘，令人想置身其中同魚仔一齊游水。嗰度一切嘅人、事、物，令你忘記煩人嘅事。

漢文同阿公嘅屋企，令我想起嗰種簡樸嘅生活。

社頂公園，亮亮熱心咁為兩個老外介紹墾丁之美。

墾丁大街嘅晚上，阿南喺嗰度隔入當地生活。

恆春警區嘅警車，阿佐維持治安...

埔頂草園，幾個年青人為理想打拚，開民宿，令讓更多人知道墾丁嘅美、好。

... 就係呢一切，令我愛上墾丁。

...Sorry，我冇提曉緯(雨不停)，因為我唔鍾意佢...

感覺墾丁

墾丁係屬於大自然嘅。

社頂公園嘅一草一木，都令我讚嘆不已。因地殼變動而上升嘅珊瑚礁、因自保而有毒嘅樹、為毒樹提供解藥嘅樹...

埔頂草原上軟綿綿嘅草坡...

龍磐公園嘅「地理」課堂...

關山嘅日落景色...

出火嘅現象...

墾丁係休閒嘅。

好欣賞當地人嘅生活方式同態度。有客就做吓生意，冇客就行吓、睇吓電視、看吓海、釣吓魚... 生活原來可以好簡單。點解要每日咁辛苦，喺公司要同其他人勾心鬥角、爭名奪利... 為乜喎...

墾丁係自由嘅。

因為我自己一個人去到當地，冇人識我，我可以唔理其他人點睇我，去我想去嘅地方、做我想做嘅事、食我想食嘅嘢...

墾丁係新奇刺激嘅。

我可以坐証上一個初次見面嘅人嘅電單車，冇帶安全帽嘅墾丁橫衝直撞，任風吹喺我面上...

墾丁可以幫我療傷。

佢用大自然嘅力量、當地人嘅熱情親切，幫我明白唔可以再留喺昨天 - 當然，朋友嘅鼓勵亦好重要，但墾丁俾我一個可以思考嘅平台，令我諗清楚跟住落嚟嘅路應該點走。

不過人算不如天算，現實永遠有方法打亂我嘅計劃、決定。

墾丁之行

我對墾丁嘅第一印象有誤解，有好多個原因：

• 雖然墾丁係一個渡假勝地，但台灣嘅聖誕並唔係假期；

• 墾丁大街喺日頭只係一條普通嘅街；

• 12月並唔係旅遊旺季...

所以，一個普通嘅下晝，街上又點會人山人海？

日落西山，墾丁大街開始活過來。

... 但我想像中嘅墾丁並唔係咁樣...

待續...

墾丁小灣

呢個係離開旅店最近嘅海灘(旅店外嘅大灣好似有工程做緊，所以唔算)，我用20分鐘行過去。街上冇乜行人，我就一個人傻吓傻吓咁行。果然，到咗海灘，我正式開始有去咗渡假區嘅感覺。

沙灘上有一個酒店開嘅bar，旅人可以飲吓嘢，睇吓海/浪/女；海上面有一班後生仔&女大叫大笑 - 原你佢哋玩緊香蕉船。沙灘上有一個小妹妹喺度玩沙，而疑似佢爸爸嘅男人就坐喺佢後面睇佢玩，二人自得其樂。呢一切構成一幅圖畫，名「Relax」。我就係咁，除底我嘅鞋襪，走向海邊玩水。然後好「濕」(國語發音)意咁坐喺沙灘上睇日落。人生有幾可可以停一停，欣賞大自然嘅美妙？

就因為依個係旅「行」，我又開始行。今次行咗5公里(！)去另一個景點。好遠？OK啦~畢竟人生就係「行行重行行」...

墾丁海堤旅店

係一個點樣嘅地方？下晝到達時簡直可以用「死氣沉沉」嚟形容 - 旅遊區？條街冇人嘅？

去到旅店，老闆娘好「pro」咁坐喺「front desk」招呼我，介紹東介紹西... OK，上到房，好impressed。其實間旅店嘅外觀已經迷住我。雖然我未去過希臘，但佢藍白色外牆就已經提醒我 - 你依家放緊假~ 講番間房，一啲都大：長形，入房後就係toilet - 冇門嘅，只有一塊簾；前些少就係浴室 - 都直冇門而只用一塊浴簾嘅，而且同toilet中間完全冇間隔 ，非常open。再前些少就係床 - 一張好「誘人」嘅雙人床，足夠我喺上面打關斗...外面就係小露台。That's it！但係，就好似老麥個slogan - I'm loving it (我就是喜歡)！因為...

小露台向海，可以望海；而且向西，可以睇日落 - 都幾浪漫喎...

OK~ 巡視完間房又點呢？

行街街去也。當我離開旅店開始第一日墾丁之旅嘅行程，令我對呢個地方完全改觀。

待續...

台灣南部之旅 - Day 1

高雄 - 一個熟悉的陌生城市。熟悉係因為經濟常聽見佢個大名 - 做shipping嗰陣不知安排過幾多貨去嗰度。陌生？我未去過嘛~ 但都有啲印象嘅...

要數我對佢嘅印象，只有六合夜市 - 台灣夜市個個一樣，無乜特別；旗津漁港 - 台灣嘅鯉魚門？但人嘛...

熱情嘅民宿老闆娘，帶俾我第一次坐電單車嘅體驗，原來真係好「爽」；佢又帶我去睇一個好特別嘅展覽，俾我同台灣創意文化打招呼；帶我目睹八八風災後，高雄受嘅影響 - 大自然開始反擊喇~最後以一餐好抵食嘅海產做終結。更「過份」(因佢太好人喇...)嘅係，佢仲要喺第二日送我去搭車去墾丁。台灣人嘅熱情真係好厲害~