原來係咁！

老豆：

今日聽同學講，原來「是爹拿」係自殺嘅，所以你有可能喺上面撞佢唔到。

其實有乜事咁大不了要自行了斷？有病咪醫囉，人哋羅君左要切咗對腳都依然堅持落去，點解佢要做逃兵喎？

其實，你有冇嬲我同意醫生俾你走？我知你依然掛住媽咪。你會唔會覺得係我殺死你？我一直好驚，好驚你會唔原諒我，怨我夾硬分開你同媽咪？

原諒我，我真係唔忍心見到你咁辛苦仲要撐落去。十年有多，已經好夠啦~ 我唔想因為自私，為咗自己唔捨得你，而令你繼續受苦。所以就算你嬲我、怨我，我依然會咁做。呢條數我先欠住你，他日我去搵你嗰陣，你想點打我、鬧我、罰我都可以。OK？

肥仔、2009年12月23日、屋企

點解會咁？

老豆：

今日收到中大同學嘅通知，一個同我同過班嘅同學離世嘅消息。我好震驚。

如果咁啱你遇到上面嗰個老頂，可唔可以幫我問吓佢到底點諗嘢：

點解好地地一個後生女，上天要咁快召佢返上去？如果預咗要咁快召佢返上去，點解要俾佢有智慧讀咁多書？我未正式同佢講過一句說話，但都有點頭微笑，覺得佢應該係一個有禮貌、有教養嘅女仔。上天點解要帶佢返去，唔俾機會佢教化世人？

就好似你係我嘅好爸爸，點解上天要先將疾病痛苦帶俾你，再將你從我身邊搶走？

究竟上面個老頂點樣諗嘢、諗緊乜嘢？你可唔可以幫我問吓佢？

肥仔、2009年12月22日、屋企

P.S. 第一次過冬至冇你喺度，我用笑容掩飾我嘅心痛... 老爸，冬至快樂！

P.S.S. 又如果你見到一個初嚟步到、讀過中大翻譯系碩士叫「是爹拿」嘅女仔，俾面我幫吓佢。佢一個女仔一初到陌生嘅地方一定會要人幫。唔該你吖...