買書！買書！買書！

唉~ 我自問唔係一個大駛嘅人，但正如我ex老闆講：每個人都有一個死穴。我嘅其中一個係：書。

為墾丁之旅，已經第二次買guidebook - 我一個人第一次去墾丁嘛。行去俾錢嗰陣，又唔覺意見到兩本好「有趣」嘅書。一本係關於兩性關係，講男人比女人更需要愛(!)；另一本係講令人改變嘅一啲想法。真係好得意。

就係咁，我又買咗百幾蚊書喇...

墾丁療傷之旅

其實我唔知自己有乜傷；但自從上個月去完台北之後，個心就成日有把聲叫我去墾丁。

墾丁有乜好玩？我完全冇idea - 我怕晒，又唔識游水，冇國際車牌。講真，我真係唔知去嚟做乜。不過，就係好想去 - 單純咁好想去。就好似冥冥中有啲嘢對我發出呼喚：嚟啦、嚟啦...

電視上話，墾丁係一個療傷嘅地方。其實我唔係好明，不過，我希望嗰度嘅陽光、海灘。大自然嘅風景，可以幫我。幫我啲乜？或者係藉由墾丁嘅藍天、白雲、陽光、海灘，幫我搵番一個識得由心度笑出嚟、真正嘅Michelle...

可知我想他

一啲都唔似天蠍座嘅人。我應該係一個傳說中敢愛敢恨嘅天蠍女，但...

我放唔底。

首先，我唔係一個愛恨都好強烈嘅人。可能就係因為咁，就更加優柔寡斷。成日想死唔想死咁，好討厭。

同一個commercial complex做嘢，我成日想同佢有個不期而遇(?)，但又好怕見到面之後嘅dead-air，更怕佢嗰啲溫柔而具大殺傷力嘅眼神；每年佢生日，我都好想不經意咁，send個message俾佢，但又怕收唔到佢嘅回應；最慘係每年嘅生日，都極希望佢會打個電話，甚至send個短訊俾我，祝我事事順利。

冇。乜都冇。事實上，喺同一個commercial complex，我已經好耐冇見過佢- 不論係返工、食飯、放工，或者任何時候，都再撞佢唔到；因為怕收唔到回應，我已經冇再喺佢生日時send message俾佢。只係，我依然希望有一日，我可以收到佢隻字片語，俾我知道，佢仍然係我嘅「朋友」。

我好掛住佢...

我... 變態！

睇電影電視時，最鍾意睇kiss scene，總覺得好sweet。不過，一定要係俊男美女先得 - 邊個想睇青蛙咀田雞？？？

但kiss scene都有國籍。日本嗰啲最奇怪，一係就四片嘴唇好似磁石咁貼住 - 唔郁；一係就伸晒脷，作攪拌機狀，喺對方個口攪嚟攪去 - 好噁心... 美國比較唯美，男女有互動，交到戲；大中華地區嗰啲風格比較接近西方國家，而且更有親切感 - 大家都黃皮膚嘛~

... 我啲影評幾時變到包括埋吻技呀？？？

再說敗犬

斷斷續續咁，終於睇完「敗犬女王」。我唔可以話呢套電視劇「好好睇」，但中/熟女睇完一定好有feel。

原來，一個人生活並唔係一件「慘」事，你可以將你嘅工作同生活安排得好豐富；而且：人，根本唔需要理其他人嘅眼光。我過我想過嘅生活，做我想做嘅事 - 幾好吖~

不過，劇中嘅單無雙係幸福嘅，因為佢有盧卡斯。(唓~ 電視劇虛構人物，想幾好有幾好...)我？慢慢搵囉~ 因為...

我會喺墾丁，搵到我嘅晴天~

<11月23日>

http://www.youtube.com/watch?v=yfETTcuNUSI&feature=related