Day 1

早上‧放假

人，不論生死，始終離不開「買嘢」。買花布置靈堂、買飲品西餅等都唔可以缺少。呢啲係香港人特性鍾意買嘢，定根本係中國傳統習俗？費解 - 費事去解。

下午‧出發去靈堂

第一次發現原來我哋三兄妹只係平時唔出聲，有事就好齊心嘅人。一齊出門口，一齊為對老豆作最後致敬做準備。

靈堂

老豆個樣好安祥。我為佢安排著佢平時著嘅衫。化妝師亦為佢化一個好自然嘅妝，令佢睇嚟好似瞓咗一樣。

親友陸陸續續到嚟拜祭 - 其實只係鞠躬。又係悲喜交集嘅感覺：悲 - 點解一定要有大事親戚先會「聚首一堂」？喜(其實只可以算係「安慰」) - 原來有咁多人關心老豆同我哋屋企人。