原來係咁！

老豆：

今日聽同學講，原來「是爹拿」係自殺嘅，所以你有可能喺上面撞佢唔到。

其實有乜事咁大不了要自行了斷？有病咪醫囉，人哋羅君左要切咗對腳都依然堅持落去，點解佢要做逃兵喎？

其實，你有冇嬲我同意醫生俾你走？我知你依然掛住媽咪。你會唔會覺得係我殺死你？我一直好驚，好驚你會唔原諒我，怨我夾硬分開你同媽咪？

原諒我，我真係唔忍心見到你咁辛苦仲要撐落去。十年有多，已經好夠啦~ 我唔想因為自私，為咗自己唔捨得你，而令你繼續受苦。所以就算你嬲我、怨我，我依然會咁做。呢條數我先欠住你，他日我去搵你嗰陣，你想點打我、鬧我、罰我都可以。OK？

肥仔、2009年12月23日、屋企