隨想

內疚 - 爸離開前我曾向佢發脾氣。我咁大過女都未對佢發過咁大脾氣，呢次係第一次，亦係唯一一次。

罪惡感 - 我唔係唔想浮出水面，但，好驚同朋友一齊吃喝玩樂，覺得好guilty。所以我做乜都自己一個人。

矛盾 - 唔想返屋企，怕自己會亂諗嘢；但又唔想面對外面嘅人 - 陌生人也好，朋友也好。我覺得依家我已經無晒安全感。我嘅依靠已經唔喺度，我仲可以靠邊個？

朋友 - AK話我係乜嘢人群乜嘢人，所以實際嘅人喺我要精神支持時唔到support我。係我表演得太強，人人以為我可以撐我住？定係「各家自掃門前雪」先係人嘅天性同本性，我死係我嘅事，無人理係應該嘅？

眼淚 - 邊解好似流唔停？已經一個月，無論喺咩時間、地點，做緊乜嘢，只要一想起，我就會一泡眼淚，準備好傾盆而出。好肉酸...

想得太多 - 呢個係我嘅優點家係缺點？連睇戲，一套溫情片都可以令我喊唔停。女主角姐姐結婚，由父親領入禮堂，交俾新郎。原本好溫馨嘅一幕，點解可以令我「悲從中來」？嫁唔去？定係會帶我入禮堂嗰隻手已經唔喺度？

忘記 - 忘記好嗎？我唔想忘記，但我仲要向前行。點算好呀？邊個可以幫我呀？

再一次不得不承認有自己office嘅好處。我依家成塊面都係眼淚，但我可以閂埋門，無人知我喊緊。